(က)

မြေပေါ်ဟင်းလင်းဖွင့် သတ္တုတွင်း ( Open Cast Mine ) များတွင် မြေသား ကမ်ပါးယံများ  ကိုလှေခါးထစ် (Bench )စနစ်ဖြင့်တူးဖော်ရန် ( Bench Height ) နှင့် ( Bench Slope ) ကို သတ္တုတွင်းဒီဇိုင်း ( Mine Design ) နှင့်အညီ တူးဖော် ဆောင်ရွက်ရန်နှင့် စွန့်ပစ်မြေစာများကိုလည်း သတ်မှတ်ထားသည့်နေရာတွင် စနစ် တကျ ထားရှိ စွန့်ပစ်စေရန်။

(ခ)

မိုးရွာသွန်းမှုကြောင့် မြေပေါ်ဟင်းလင်းဖွင့် သတ္တုတွင်းအတွင်းသို့ ဝင်ရောက်လာသည့် ရေများကို ကောင်းမွန်စွာ စွန့်ထုတ်နိုင်ရေးအတွက် ရေနုတ်မြောင်း( Drainage ) များ၊ ရေစုကန် (Sump ) များအား ရှင်းလင်းထားရှိရန်နှင့် ရေစုပ်စက် ( Pump ) များကို ကြံ့ခိုင် ကောင်းမွန်အောင် ဆောင်ရွက်ထားရှိပြီး အရံ ( Pump )များကိုလည်း အသင့် တပ်ဆင် ထားရှိရန်။

(ဂ)

မြေပေါ်ဟင်းလင်းဖွင့်သတ္တုတွင်းများ၏ လုပ်ကွက်ကမ်းပါးယံတစ်လျှောက် ဖြတ်သန်း ဖောက်လုပ်ထား သောလမ်း ( Haul Road )များအား ရေတိုက်စားမှု၊ မြေပြိုကျမှုများ မရှိစေရေးအတွက် ထိန်းသိမ်း ရေးအစီအမံများကို ကြိုတင်၍ဆောင်ရွက်ထားရှိရန်နှင့် မိုးရာသီကာလ အတွင်းလမ်း (HaulRoad) များကို နေ့စဉ်စစ်ဆေးကြပ်မတ်ဆောင်ရွက်ရန်။

(ဃ)

မိုးရာသီကာလ၌မြေအောက်သတ္တုတွင်း ( Underground Mine ) များတွင် ရေယိုစိမ့်မှု များပြား လာမည်ဖြစ်၍ ပြည့်စုံလုံလောက်သည့် ရေထုတ်စနစ် (Dewatering System ) ထားရှိ ဆောင်ရွက်ရန်နှင့် ဆင်းတွင်း ( Shaft ) များ၊ လှိုဏ် ( Tunnel, Adit, Cross-Cut ) များ၊ တူးဖော်ရေး လုပ်ကွက် (Stope) များ ကြံ့ခိုင်ရေးကို အထူး အလေးပေးဆောင်ရွက်ရန်။

(င)

ပင်မဆင်းတွင်း ( Main Shaft ) များအတွင်းသို့ ရေစီးဝင်မှုမရှိစေရေးအတွက် မြေပေါ်(Surface)တွင် ရေလွှဲမြောင်းများဖောက်လုပ်ထားရှိရန်နှင့် ရေတိုက်စားမှုနှင့် ရေယိုစိမ့်မှု ကြောင့် လှိုဏ်အဝ ( Portal of Tunnel or Adit ) ပြိုပျက်မှု မရှိစေရေး အတွက် ကြိုတင် စီမံထားရှိရန်။

(စ)

မိုးရာသီကာလအတွင်း ရေဖိအားကြောင့် မြေအောက် သတ္တုတွင်းများ၏ အမိုးနှင့် ဘေးနံရံများတွင် ထောက်ကန်ထားသည့် သစ်သားထောက်တိုင်များအပေါ် သက်ရောက်မှုရှိနိုင်သဖြင့် နေ့စဉ်လုပ်သားများ လုပ်ငန်းခွင်သို့ မဝင်မီစစ်ဆေးရန်နှင့် ထောက်တိုင်သစ်သား (Timber Support ) များအက်ကွဲလာပါက အမြန်လဲလှယ် ဆောင်ရွက်ရန် (သို့မဟုတ်) ယာယီ ထိန်း ထောက်ရန်။

(ဆ)

မိုးရာသီကာလတွင် ရေစိမ့်နှုန်းများ၍  မြေသားတည်ငြိမ်မှုမရှိသော မြေအောက်လုပ်ကွက်များကို မြေသား တည်ငြိမ်မှုရှိသည်အထိ ရပ်နားထားရန်။

(ဇ)

မိုးရာသီကာလအတွင်း ယာယီထုတ်လုပ်မှု ပိတ်ပင်ထားသည့် လုပ်ကွက်များအား ညွှန်ကြားချက်များ နှင့်အညီ တိတိကျကျ လိုက်နာဆောင်ရွက်မှု ရှိ/မရှိ စစ်ဆေး ကြပ်မတ်ရန်။

(စျ)

မိုးများသည့်ရက်များတွင် လုပ်ငန်းခွင် ဘေးအန္တရာယ်ကင်းရှင်းမှုကို အထူးဂရုပြု ဆောင်ရွက်ရန်နှင့် ဘေးအန္တရာယ်ကင်းရှင်းသည့် အခြေအနေရှိမှသာ မြေပေါ်/ မြေအောက် သတ္တုတွင်းလုပ်ကွက်များသို့ ဝင်ရောက်လုပ်ကိုင်ဆောင်ရွက်ရန်။

(ည)

မိုးရာသီကာလအတွင်း မြေပေါ်/မြေအောက် တူးဖော်လုပ်ကိုင်လျက်ရှိသည့် လုပ်ကွက်များ၌ အသုံးပြု လျက်ရှိသော လျှပ်စစ်ဓာတ်အားပေးစက် (Generator )များ၊ မီးခလုတ် (Switch, Braker)များ၊ ဝါယာကြိုးများမှ လျှပ်စစ်ဘေးအန္တရာယ် မဖြစ်ပွားရေးအတွက် ဂရုပြု စစ်ဆေးဆောင်ရွက်ရန်။

(ဋ)

ယမ်းတိုက်များတွင် တပ်ဆင်ထားရှိသော မိုးကြိုးလွှဲများ (Active) ဖြစ်/မဖြစ် ကြိုတင်စစ်ဆေး ဆောင်ရွက်ရန်။

(ဌ)

လူနေအိမ်အဆောက်အဦများကို အန္တရာယ်ရှိနိုင်သည့် ကမ်းပါးယံများ၌ တည်ဆောက်ခြင်း လုံးဝမပြု လုပ်ရန်နှင့် ကမ်းပါးယံအခြေနှင့် ကမ်းပါးစောင်းအနီး တည်ဆောက်ထားသော အဆောက် အဦများတွင် လူများနေထိုင်မှုလုံးဝမပြုလုပ်ရန်။

(ဍ)

မိုးရေကြောင့် ကမ်းပါးယံပြိုကျနိုင်သည့် လမ်းကြောင်းများ၊ မြေကျွံနိုင်သည့်ဧရိယာများတွင် သတိပေး ဆိုင်းဘုတ်များစိုက်ထူထားရန်။

(ဎ)

ဖြစ်ပေါ်လာသော အက်ကြောင်းများ မြေပေါ်သတ္တုတွင်းများ၌ အခြေအနေနှင့် မြေပြင် ထူးခြားမှုတို့အား တာဝန်ရှိသူအဆင့်ဆင့်သို့ အကြောင်းကြားသတင်းပို့ခြင်း၊ တာဝန်ရှိသူများမှ ချက်ချင်းအရေးယူခြင်း များ ဆောင်ရွက်ရန်။

(ဏ)

လုပ်ကွက်အနီး ဖြတ်သန်းစီးဆင်းနေသောချောင်းများ၊ မြောင်းများကိုရေစီး​ရေလာ ကောင်းမွန်အောင် ဆောင်ရွက်ထားရှိရန်နှင့် နွေကာလတွင် ချောင်းများအားဖြတ်၍ ယာယီမြေဖို့ထားသော မြေသားတမံ များနှင့် ဆောက်လုပ်ထားသော ယာယီတံတားများကို ဖြုတ်သိမ်းရှင်းလင်းထားရန်။

(တ)     

အခါအားလျော်စွာ ထုတ်ပြန်ထားသည့် ဘေးအန္တရာယ်ကင်းရှင်းရေး လမ်းညွှန်ချက်များကို တိကျစွာ လိုက်နာဆောင်ရွက်ရန်။

(ထ)

လုပ်ငန်းခွင်ဘေးအန္တရာယ် ကင်းရှင်းရေးအတွက် လုပ်ငန်းဌာနအလိုက် ကြီးကြပ်ရန် တာဝန်ရှိသူ အဆင့်ဆင့်မှ အမြဲကြပ်မတ်စစ်ဆေးပြီး ထူးခြားဖြစ်စဉ်နှင့် စစ်ဆေးတွေ့ရှိမှုများအား အမှတ်(၁) သတ္တုတွင်းလုပ်ငန်းသို့တင်ပြရန်။