ဆယ့်နှစ်လရာသီပွဲတော်များတွင် တစ်ခုအပါအဝင်ဖြစ်သည့် မြန်မာ့ရိုးရာယဉ်ကျေးမှု အစဉ်အလာကောင်းကို လက်ဆင့်ကမ်းထိန်းသိမ်းရန်၊ ဝန်ထမ်းအချင်းချင်း ချစ်ကြည်ရင်းနှီးမှု တိုးပွားပြီး စည်းလုံး ညီညွတ်စွာဖြင့် ပူးပေါင်းဆောင်ရွက်တတ်မှုကို ပိုမိုအားကောင်းလာစေရန်၊ ဝန်ထမ်းများ ပျော်ရွှင်ပြီး လုပ်ငန်းခွင်သာယာစေရန်ရည်ရွယ်၍ သယံဇာတနှင့် သဘာဝ ပတ်ဝန်းကျင် ထိန်းသိမ်းရေးဝန်ကြီးဌာန၏ (၁၈) ကြိမ်မြောက် မြန်မာ့ရိုးရာ ထမနဲထိုးပြိုင်ပွဲကို ၃-၂-၂၀၂၆ ရက်နေ့ နံနက်ပိုင်းတွင် နေပြည်တော်ရှိ သစ်တောဦးစီးဌာနရုံးချုပ်တွင် ကျင်းပရာ ပြည်ထောင်စုဝန်ကြီး ဦးခင်မောင်ရီ၊ ဒုတိယဝန်ကြီး ဦးမင်းသူ၊ အမြဲတမ်းအတွင်းဝန်နှင့် ဌာနဆိုင်ရာတာဝန်ရှိသူများ၊ အကဲဖြတ် အမှတ်ပေး အဖွဲ့ဝင်များ၊ ပြိုင်ပွဲဝင်အသင်းများ၊ ဝန်ကြီးဌာနအောက်ရှိ ဌာနများနှင့် တက္ကသိုလ်တို့မှ ဝန်ထမ်းများ တပျော်တပါး ပါဝင် ဆင်နွှဲကြသည်။
ရှေးဦးစွာ ပြည်ထောင်စုဝန်ကြီးက မြန်မာ့ရိုးရာ ထမနဲထိုးပြိုင်ပွဲအား ဖွင့်လှစ်ပေးပြီး ဌာနများနှင့် တက္ကသိုလ်တို့မှ ပြိုင်ပွဲဝင်အသင်း (၁၂) သင်း၏ ထမနဲထိုး ယှဉ်ပြိုင်နေမှုအား လှည့်လည် ကြည့်ရှု အားပေးသည်။
ပြိုင်ပွဲအပြီးတွင် ပြည်ထောင်စုဝန်ကြီးက ပထမဆုရရှိသော မြန်မာ့သစ်လုပ်ငန်း အသင်းအား လည်းကောင်း၊ ဒုတိယဝန်ကြီးက ဒုတိယဆုရရှိသော သစ်တောဦးစီးဌာန အသင်းအား လည်းကောင်း၊ အမြဲတမ်းအတွင်းဝန်က တတိယဆုရရှိသော မြေတိုင်းဦးစီးဌာန အသင်းအား လည်းကောင်း၊ ဌာနဆိုင်ရာ တာဝန်ရှိသူများက နှစ်သိမ့်ဆုရရှိသော အသင်းများအား လည်းကောင်း အသီးသီး ဆုများ ပေးအပ်ချီးမြှင့်ခဲ့သည်။
