မြန်မာသက္ကရာဇ် ၁၃၈၇ ခုနှစ်၊ ဝါဆိုလဆန်း (၁၄)ရက်၊ ခရစ်သက္ကရာဇ် ၂၀၂၅ ခုနှစ်၊ ဇူလိုင်လ (၈)ရက် (အင်္ဂါနေ့)၊ နံနက် (၁၀)နာရီတွင် နေပြည်တော်၊ ရုံးအမှတ် (၁၉) ၌ သယံဇာတနှင့်သဘာဝပတ်ဝန်းကျင် ထိန်းသိမ်းရေးဝန်ကြီးဌာန၊ ပြည်ထောင်စုဝန်ကြီးအား အမှူးထား၍ သယံဇာတနှင့်သဘာဝပတ်ဝန်းကျင် ထိန်းသိမ်းရေးဝန်ကြီးဌာန၊ (၃၄)ကြိမ်မြောက် ဝန်ထမ်းမိသားစု ဝါဆိုသင်္ကန်းဆက်ကပ်လှူဒါန်းပွဲ အခမ်းအနားကို ကျင်းပပြုလုပ်ခဲ့သည်။

          ရှေးဦးစွာ သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ (၃၄) ကြိမ်မြောက် ဝန်ထမ်း မိသားစု ဝါဆိုသင်္ကန်းဆက်ကပ်လှူဒါန်းပွဲ အခမ်းအနားအား “နမောတဿ” သုံးကြိမ် ညီညာဖျဖျ ရွတ်ဆို ဖွင့်လှစ်ခဲ့သည်။ထို့နောက် တပ်ကုန်းမြို့၊ ဂိုဏ်းထောက်ပရိယတ္တိစာသင်တိုက်ဆရာတော်ထံမှ ငါးပါးသီလ ခံယူရန် “ဩကာသ” ကန်တော့ချိုးဖြင့် ညီညာဖျဖျ ကန်တော့ကြသည်။

          ပြီးနောက် သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ မြေတိုင်းဦးစီးဌာန၊ ညွှန်ကြားရေးမှူးချုပ် ဦးစိန်မင်းမှ တပ်ကုန်းမြို့၊ ဂိုဏ်းထောက်ပရိယတ္တိစာသင်တိုက်ဆရာတော်အား ဝါဆို သင်္ကန်းနှင့် နဝကမ္မအလှူငွေများကိုလည်းကောင်း၊ သစ်တောနှင့်ပတ်ဝန်းကျင်ဆိုင်ရာတက္ကသိုလ်၊ ပါမောက္ခချုပ် ဒေါက်တာခင်မောင်ဆင့်မှ ပဏ္ဍိတာရာမစာသင်တိုက်ဆရာတော်အား ဝါဆိုသင်္ကန်းနှင့် နဝကမ္မ အလှူငွေများကို လည်းကောင်း၊ ဘူမိဗေဒလေ့လာရေးနှင့် ဓာတ်သတ္တုရှာဖွေရေးဦးစီးဌာနမှ ဒုတိယ ညွှန်ကြားရေးမှူးချုပ် ဒေါက်တာမြင့်စိုးမှ အောင်သိဒ္ဓိကျောင်းတိုက် ဆရာတော်အား ဝါဆိုသင်္ကန်းနှင့် နဝကမ္မအလှူငွေများကိုလည်းကောင်း၊ အခမ်းအနားသို့ တက်ရောက်လာသည့် ဌာနဆိုင်ရာ တာဝန်ရှိသူများမှ ကြွရောက်လာကြသော ကျန်ရှိသည့် ဆရာတော်သံဃာတော်များအား ဝါဆိုသင်္ကန်းနှင့် နဝကမ္မအလှူငွေ များကို လည်းကောင်း ဆက်ကပ်လှူဒါန်းခဲ့ကြသည်။

          ၎င်းနောက် တပ်ကုန်းမြို့၊ ဂိုဏ်းထောက်ပရိယတ္တိစာသင်တိုက်ဆရာတော် အမှူးပြုသော ဆရာတော် သံဃာတော်များမှ ပရိတ်တရားတော်နှင့် တပ်ကုန်းမြို့၊ ဂိုဏ်းထောက်ပရိယတ္တိစာသင်တိုက်ဆရာတော်မှ အလှူတော်မင်္ဂလာနှင့်ပတ်သက်သည့် အနုမောဒနာတရားတော်များ၊ ရေစက်သွန်းချတရားတော်များအား ချီးမြှင့်ခဲ့သည်။

          ထို့နောက် သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ (၃၄) ကြိမ်မြောက် ဝန်ထမ်း မိသားစု ဝါဆိုသင်္ကန်းဆက်ကပ်လှူဒါန်းပွဲ အလှူတော်မင်္ဂလာအခမ်းအနားကို အောင်မြင်စွာ ကျင်းပပြီး “ဗုဒ္ဓသာသနံ စိရံတိဋ္ဌ္စတု” သုံးကြိမ်ရွတ်ဆိုပြီး အခမ်းအနားအား ရုပ်သိမ်းခဲ့သည်။

          ပြီးနောက် တပ်ကုန်းမြို့၊ ဂိုဏ်းထောက်ပရိယတ္တိစာသင်တိုက် ဆရာတော်ကြီးများနှင့်တကွ  ဆရာတော် သံဃာတော်များအား နေ့ဆွမ်းဆက်ကပ်လှူဒါန်းခြင်းနှင့် အခမ်းအနားသို့ တက်ရောက် လာသည့် ဧည့်သည်တော်များအား နေ့လည်စာဖြင့် ကျွေးမွေးဧည့်ခံခဲ့ကြောင်းသိရသည်။